رضا براهنی! بو آد یالنیز سون بیر آیدا آذربایجان (بورادا و سونرا، طبیعی کی، قوزئی آذربایجان نظرده توتولور – م.م.) مطبوعاتی و ادبی ایجتیماعییتینین گوندمینه گلیب. همین واختا قدر ایسه بو بؤیوک یازیچی-موتفککیری آزسایلی ایرانشوناسلاریمیز، تک-توک ادبیاتچیلاریمیز، بیر ده آذربایجان دیاسپورونون موعیین قیسمی تانیییب. ماراقلیدیر کی، باکییا سفری زامانی ر.براهنی، دئمک اولار، بوتون معلوماتلاردا “دونیا شؤهرتلی یازیچی” کیمی تقدیم ائدیلیردی، اما ندنسه بو شؤهرت ایندیدک دونیانین (و ایکی یه بؤلونموش وطنینین) بیر پارچاسی اولان آذربایجانی احاطه ائتمهییب. حتی معلوم اولدو کی، اؤزونو آرازین او تایینداکی ادبیاتین بیلیجیسی سایان شاعر و ناشیریمیز بو واختا قدر ر.براهنینین هئچ آدینی دا ائشیتمییبمیش. باخمایاراق کی، هله بئش ایل اول سلیم بابوللا اوغلونون باش یازاری اولدوغو “دونیا ادبیاتی” درگیسینده بو سطیرلرین مؤلفینین ترجومهسینده ر.براهنینین “طلا در مس” (“میسده قیزیل”) آدلی مشهور کیتابیندان بیر پارچا چاپ ائدیلیب، اوچ ایل اؤنجه ایسه بندهنیزین رئداکتورلوغو ایله چیخان “باکی-تبریز” ژورنالیندا ر.براهنی ایله گئنیش بیر موصاحیبه درج اولونوب...
هر حالدا، رضا براهنی داک همصدری، میللت وکیلی، خالق شاعری صابیر روستم خانلینین دعوتلیسی اولاراق باکی یا گلدی، بیر چوخ گؤروشلر کئچیردی، بیر سیرا تدبیرلره قاتیلدی و کانادایا قاییتدی. من سفردن بیر ایز قالسین دئیه، ر.براهنینین کیچیک ده اولسا، بیر کیتابینی نشر ائتمک تشببوثونو قالدیردیم. صابیر بی بو تشببوثو دستکلهدی و اونون سعیی ایله یازیچی هله باکی دا ایکن منیم ترتیب ائتدیگیم “رضا براهنی: شئیرلر، موصاحیبهلر، آراشدیرما” آدلی کیتاب “قانون” نشریاتیندا ایشیق اوزو گؤردو.
ر.براهنینین بیوقرافیاسینین باشلیجا مقاملارینی عکس ائتدیرن قیسا تانیتما یازیسی ایله آچیلان کیتابا گؤرکملی ادیبین 20-دن آرتیق شئیری، ایکی موصاحیبهسی و بیر آراشدیرماسی داخیل ائدیلمیشدیر. “شئیرلر” بؤلمهسینده دوکتور علی قرهجهلونون فارسجادان چئویردیگی “تبریز شئیرلری”، مشهور “کپنکلره خیتاب” کیتابیندان سلیم بابوللا اوغلونون (9 شئیر)، بئهروز صدیقین و لاله جاوانشیرین (هرهیه 1 شئیر) ائتدیگی ترجومهلر یئر آلمیشدیر. موساهیبهلر و آراشدیرما ایسه منیم طرفیمدن ترجومه اولوناراق، چاپا حاضیرلانمیشدیر.
البته، رضا براهنی یارادیجیلیغینین میقیاسینی گؤز اؤنونه گتیردیکده (او، 60-دان چوخ کیتابین مؤللیفیدیر)، بو کیتاب، نئجه دئیرلر، دریادان بیر داملادیر، اما ایجتیماعییتیمیزی اونون شخصییتی، ادبی-تنقیدی و میللی-ایجتیماعی دوشونجهلری ایله تانیش ائتمک باخیمیندان گرکلی بیر ایشدیر. هم ده بو، ر.براهنینین آذربایجان اوخوجوسو ایله ایلک گؤروشودور. سونراکی، داها احاطهلی گؤروشلرین باش توتماسی ایسه ترجومه چی و ناشیرلریمیزدن آسیلیدیر...
سالاملار مسی آقا موعللیم دوشرگه نیزین ائیکی سینده گونده لیک باغلانتی لاریماگتیردیم سیزه اوغولار دیله یرم ساغ اولون
تشککورلر، بختیار موعللیم.
تانری یاردیمچینیز اولسون!
سلام مسیح آقا بی
بو یئنی وئبلاقینیز(یئنی دیرمی؟)اولدوقجا ایلگینج گلدی منه، سیزی تبریک ائدیرم. آرازین اوتای بوتاییندا یاشایانلار بیربیرلرینی اوخویوب و باشا دوشمه یه چالیشمالیدیرلار. کسینلیکله بونون اؤنملی و گؤزل ائتگی لری اولا بیله جک.
"قانون" کیتبابینین یایینینی دا تبریک ائتمه لی دیر البتته.
هر زامان سیزین بلاقلارینیزدا منی ایلگیلندیرن _ساده جه ایگی لندیرمک دئییل _ منه لذذت حیسی نی دویدوران یازیلار اولوب.
اؤپورم سیزی
وئبلاقینیزی ایزنیزله قالدیرمین باغلانتی لاریناآرتیردیم.
ساغ اولون
سلام،عزیز ائلیاد بی.
وئردیینیز ده یره، خوش سؤزلره و تبریک لره گؤره چوخ ساغ اولون.
بو وئبلاقا یئنی دئمک اولار. بیر آز واخت دارلیغیندان هله ایسته دیییم شکلی آلماییب. سیزی ایلگی لندیرمه سینه سئویندیم. من ده سیزی باغریما باسیب اؤپور، اوغورلار دیله ییرم.