قاسم حداد. خورما آغاجی

چئويرن: مسيح آقا محمدي

كؤچورن: سید حیدر بیات


چاغداش بحرئين شاعيري قاسم حداد 1948-جي ايلده دوغولوب. 15-دن چوخ شعر و بير نئچه نثر کيتابي‌نين مؤليفيدير. اثرلري بير چوخ خاريجي ديللره ترجومه ائديليب. بحرين يازيچيلار بيرليگي‌نين رهبريدير.


تورپاغي ديرناغيملا ائشديم –

قان چيخانا قدر!
او يئرده کي،
آللاهين خورما آغاجي
يادلارين قيلينجي آلتدا قان آغلاييردي…

ائي آللاهين خورما آغاجي!

نامعلوم شهيدين کؤينگيني
بير ائلچي کيمي يئره،
بير يئلکن کيمي سويا
گؤندر –
بيزيم اوچون!
بلکه يوخا چيخميشلار ائشيتديلر،
بلکه صداقتلي دنيز قولدورلاري
خورما اوچون داريخديلار
و غارت ائديلميش ميرواريلره ساري دؤندولر…

ائي يئر!
ائي تورپاق!
آغلاماق اوچون چاتلاما،
گؤزلري نين آتشيني
ايشغالچيلارا طرف آچ،
قاچقينلارا دا بير يول!..

ائي يئر!
ائي تورپاق!
حاضير اول،
بو کوسکون اوره‌ي اوووتماق اوچون.
غريب دنيزلرده
مشعللر حاضيرلا،
بير ده دالغاسيز کجاوه!
محبت شاميني
زئيتون ياغي و زنجفيلله
کؤکسونون اودوندا بيشير!
چونکي تعقيب اولونان بو قاچقين،
بو گؤزل شهيد
گوزگولردن سئچيلميشدير.

* * *
آه، ائي آللاهين خورما آغاجي!
اوفوقده نه گؤرورسن؟..




داوامی
بؤلمه:

خورخه لوئیس بورخئس. ائدوارد فیتس جرالد معمّاسی

چئویرن : مسیح آقا محمدی

کؤچورن : بهرام سورگون

میلادی تاریخله اون بیرینجی عصرده (هجری بئشینجی عصرده ) ایراندا عمربن ابراهیم آدلی بیر نفر دونیایا گلیر . او، گلجکده حشیشی لر (آسساسینلر ) طریقتینین اساسینی قویموش حسن بن صباح لا و سونرالار قافقازی فتح ائدن آلپ آرصلانین وزیری اولموش نظام الملک له بیرلیکده قرآنی و فقهی اؤیره نیر . زارافات لامی ، یوخسا جدی می ، دوستلار سؤزلشیرلر کی، اونلاردان هانسی حیاتدا اوغور قازانسا، او بیریلرینه ده ال توتاجاق . ایللر کئچندن سونرا نظام وزیر مقامینا یوکسه لیر. عمر اوندان یالنیز ساکیت بیر گوشه ایسته ییر کی، دوستونون ایشلرینین یاخشی گئتمه سیندن اؤترو دوعا ائده و رقملر اوزه رینده دوشونه بیلسین . (حسن ایسه یوکسک وظیفه ایسته ییب، بونا نائیل اولور، سونرا دا وزیری اؤز یولونون اوستوندن گؤتورور) . نیشابورون گلیریندن ایلده اون مین دینار مواجیب آلان عمر اؤزونو بوتونلوکله علمه حصر ائتمک ایمکانی قازانیر.

او، آستورلوگییایا اینانمیر، آمما آستورونومییا ایله مشغول اولور، سلطانین حمایه سی آلتیندا تقویم اصلاحاتیندا اشتراک ائدیر و جبره داییر مشهور اثرینی یازیر ـ بو اثرده بیر و ایکی درجه لی تنلیکلرین ریاضی حلّی و اوچ درجه لی تنلییین کونوس کسیکلری واسطه سی ایله هندسی حلّی تکلیف اولونور. اونون ماراق دایره سی رقملرین و اولدوزلارین سیرلری ایله محدودلاشمیر: او، شخصی کیتاب خاناسینین بیر کونجونده اوتوروب اسلام عالمینده «میصیرلی افلاطون» و یا «یونانیستانلی مرشد» آدلاندیریلان پلوتینین تراکتاتلارینی و «صافلیق قارداشلاری» نین بدعت و میستیکا ایله دولو اللی دن آرتیق رساله سینی موطالعه ائدیر ـ بو اثرلرده ثبوت اولونور کی، دونیا واحیدین تجللاسیدیر و گئج ـ تئز واحیده قاییداجاقدیر...
کیمی اونو آیریجا اشیالاردان کناردا عمومی مفهوملارین موجود اولمادیقینی ادعا ائدن فارابی نین، کیمی ده دونیانین ابدیلییینه اینانان ابن سینانین داوامچیسی ساییر. بیر منبع ده یازیلدیغینا گؤره، او، روحون اینسان بدنیندن حئیوانلارین بدنینه کئچمه سینه اینانیر، یاخود دا ائله گؤستریر کی بونا اینانیر ـ و حتی بیر دفعه پیفاقور ایتله دانیشدیغی کیمی، اودا اوزون قولاغلا صحبت ائدیر. او، آزاد فیکیرلی دیر، عینی زاماندا قرآنین ان چتین یئرلرینین دوزگون تفسیرینده چوخ ماهیردیر، چونکی ایسته نیلن عالیم بیر نوع ایلاهیاتچی دیر و بونون اوچون ایمانا احتیاج یوخدور.
آسترونومیا ، جبر و ایلاهیاتدان یورولوب دینجه لدییی زامان عمربن ابراهیم الخیامی بیرینجی، ایکینجی و دؤردونجو میصراعلاری هم قافیه اولان روباعیلر یازیر، همین روباعیلرین توپلاندیغی ان کامیل ال یازمادا اونلارین سایی بئش یوزه یاخیندیر ـ بو ایسه محصول دارلیغا خصوصی اهمیت وئریلن ایراندا (لونه و کالدئرونون دؤورونده ایسپانیادا اولدوغو کیمی) مؤللیف اوچون اصل بی آبیرچیلیق دیر .
هجری 517- جی ایلده عمر «شئی لرین بیرلییی و چوخلوغوحاققیندا» رساله نی اوخودوغو زامان اؤزونده ناسازلیق دویور و بیردن نسه حیس ائدیر. او، آیاغا دوروب بیر داها گؤرمه یه جه یی صحیفه نی نیشانلاییر و اوزونو آللاها توتور ـ او آللاها کی، هر حالدا موجوددور و عمر جبره دایر اثرینین چتین یئرلرینده اوندان کمک دیله میشدیر. ائله همین گون غروب چاغی او، وفات ائدیر. بوزامان مسلمان جغرافیا چیلارینا بللی اولمایان شمال ـ غربده کی بیر آدادا ایسه نوروئچلی لرین کرالینی دارماداغین ائتمیش ساقسلارین کرالینی نورمانلارین هئرسوقو مغلوبییته اوغرادیر.
ترقی، تنزل و چئوریلمه لرله دولو یئددی عصر کئچیر و اینگلیس ده فیتس جرالد آدلی بیر نفر دونیایا گلیر. اولا بیلر کی، او، عمر قدر عاغیللی دئییل، آمما اوندان خیلی حساس و غصه لی دیر . فیتس جرالد امین دیر کی، ادبیات اونون طالعیدیر. اودور کی هئچ نه یی دوشونمه دن تام عناد کارلیقلا اؤزونو ادبیاتا حصر ائدیر . ان یاخشی کیتابلاردان بیری سایدیغی «دن کیشوت»و دؤنه ـ دؤنه اوخویور (بو سیرایا او، شئکسپیرین و «ایستکلی قوجا» ورگیلی نین اثرلرینی ده داخیل ائدیر)، عینی زاماندا سؤز احتیاطینی زنگینلشدیرمک اوچون لغتلره مئهرینی سالیر. او آنلاییر کی قلبینده موسیقی گزدیرن هر بیر کس اولدوزلارین التقات گؤستردییی تقدیرده، حیاتی بویو اون ـ اون ایکی شئعیر یازماق ایقتیداریندادیر، لاکین اؤزو بو خیردا امتیازدان سوءاستفاده ائتمک نییتینه دوشمور . تانینمیش آداملارلا ( تئننیسون لا، کارلئیل له، دیکئنزله، تئککئرئی له ) دوستلوق ائدیر و اؤزونون بوتون تواضع کارلیغینا و مئهربانلیغینا باخمایاراق، اونلارا قطعییا قیلیقلانمیر .«ائوفرانور» آدلی کیفایت قدر ادبی دیالوگو، کالدئروندان و بؤیوک یونان فاجعه نویسلریندن بابات ترجومه لرینی چاپ ائتدیریر. ایسپانجادان فارس دیلینه کئچیب قوشلار حاققیندا « منطق الطیر» آدلی میستیک پوئمانین ترجومه سینه گیریشیر ـ بو اثرده قوشلار اؤز پادشاهلاری سیمرغون آختاریشینا چیخیرلار و یئددی وادینی آشیب اونون سارایینا چاتاندا گؤرورلر کی، اونلارین آیریلیقدا هر بیری و بوتونلوکده هامیسی سیمرغ دور.
1854- جو ایلده عمرین الیفبا سیراسی ایله دوزولموش روباعی لریندن عبارت بیر ال یازما فیتس جرالدین گؤزونه ساتاشیر. او، روباعی لردن بیر نئچه سینی لاتین دیلینه چئویریر و بیردن کشف ائدیر کی، اونلاردان اؤز داخلی قورولوشو و صبح، گول، بوبول اوبرازلاریندان توتموش گئجه و قبیر لؤوحه لرینه قدر مؤوضوع جا اینکیشافی اولان بوتؤو بیر کیتاب یاراتماق اولار. فیتس جرالد قایغی سیز و بیلدییینی ائله ین تنها بیر آدام اولاراق، اؤزونون بوتون حیاتینی بو غیرعادی و اینانیلماز نییتین گرچکله شمه سینه حصر ائدیر. 1859- جو ایلده او، «روباعیلر»ین ایلک ترجومه سینی نشر ائتدیریر، بونون آردینجا ایسه چوخلو واریانتلار و دقیقلشدیرمه لرله دیگر نشرلر مئیدانا چیخیر، و معجزه باش وئریر: آرابیر شعرله ایله نن فارس آسترونومو ایله ایسپانیادا و شرق ده یارانمیش کیتابلار آراسیندا بعضا معناسیز یئره ائشه لنن غریبه انگلیسین تصادفی گؤروشوندن نه بیرینجییه، نه ده ایکینجییه بنزه ین حئیرت آمیز بیر شاعیر دوغولور. سویین بئری یازیر کی، فیتس جرالد «عمر خیاما انگستانین ان یاخشی شاعیرلری سیراسیندا ابدی بیر یئر قازاندیرمیشدیر». بو اعجاز کار کیتابین هم رومانتیک، هم ده کلاسیک روحونو دریندن دویان چئسترتون ایسه قید ائدیرکی، اوندا «موسیقینین توتولمازلیغی و یازینین پوزولمازلیغی» بیرلیکده حیس اولونور. بعضی لری فیتس جرالدین «روباعیلر»ینی فارس عنصرلری ایله بزنمیش انگلیس پوئماسی ساییرلار. اصلینده فیتس جرالد عمرین حمایه سی آلتیندا یاراتمیش، اونون دئدیکلرینی جیلالامیش، حتی بعضی شئی لری اؤزوندن اویدورموشدور، لاکین نئجه اولورسا ـ اولسون، «روباعیلر» اورتا عصر فارسلارینین گؤزویله اوخونماغی طلب ائدیرلر.
بورادا مئتافیزیک سجییه لی احتیماللارسیز اؤتوشمک اولمور . معلوم دورکی عمر روحون بیر بدندن دیگرینه کئچمه سی باره ده پلاتونیکلرین و پیفاقورچولارین تعلیمینه اینانیردی. بیر نئچه عصر اؤتندن سونرا اونون اؤز روحو انگلیس ده جسمانی تجسومونو تاپا بیلردی کی، لاتین دیلینین تاثیرینه معروض قالمیش اوزاق گئرمان لهجه سینین کؤمیی له نیشابوردا ریاضیاتین الیندن آلدیغی ادبی طالئعینی یاشاسین . لئونلو اسحاق لوریا دئییردی کی، اؤلموش آدامین روحو تسللی تاپمایان قلبه داخیل اولوب اونو روحلاندیرا، یاخود ایستیقامتلندیره بیلر. ایستیثنا دئییل کی، عمرین روحو 1857- جی ایلده فیتس جرالدین قلبینده اؤزونه سیغیناجاق تاپمیشدیر.
«روباعیلر» دونیا تاریخینه آللاهین قوردوغو، مسکونلاشدیردیغی و سئیرائتدییی بیر صحنه کیمی باخیر. علمی دیلده پانتئیزم آدلانان بو تعلیم بئله بیر فیکیر دوغورورکی، انگلیس فارس قیافه سینده دیرچه له بیلر، چونکی اونلارین هر ایکیسی ماهیتجه همین آللاهدیر، یاخود اللاهین اؤتری اوبرازی دیر. لاکین داها دوغرو و حئیرت آمیز اولانی بودور کی، بیزیم فوق الطبیعی باره ده اویدورمالاریمیزین یئرینده چوخ واخت ایشلرین اوغورلو گئدیشی دایانیر. بولودلار بعضا داغ و یا شیر فورماسی آلیر، عینیله ادوارد فیتس جرالدین کدری و اوکسفورد داکی بودلئان کیتابخاناسینین رفینده اونودولوب قالان چهرایی حرفلی سارالمیش ورق خوشبختلیکدن شئعیره چئوریلمیشدیر.
ایسته نیلن وحدت ـ سیردیر. بیزیم قهرمانلارین ـ انگلیسله فارسین بیرلییی ایسه چوخلاریندان داها معمالی دیر. تام موختلیف اینسانلار کیمی حیاتدا اونلارینکی توتمایا دا بیلردی و اؤلوم، طالئعین اویونلاری و اوزون عصرلر لازیم اولدو کی، اونلاردان بیری دیگرینی تانیسین و ایکیسی بیرلشیب بیر شاعیر اولسون.





داوامی
بؤلمه:

مسيح آقا محمدي. کاش بئله تله سمه ییدی...

ایرانین چئشیدلی اینفورماسیا آگئنت‌لیک‌لری‌نین و خبر پورتال‌لاری‌نین یایدیغی معلوماتا گؤره، نویابرین 23- ده تانینمیش شاعر و ترجومه چی شهرام شئیدایی اوزون سورن خسته ‌لیک‌دن سونرا تئهران ‌داکی منزیلینده دونیاسینی دییشیب. 42 یاشیندا...

شهرامین یارادیجی‌لیغی ایله منیم یاخین ‌دان تانیشلیغیم اوچ ایل اوله تصادف ائدیر. 2006-جی ایلین ائله نویابر آییندا تورکییه‌دن، ایستانبولدا کئچیریلن پوئزیا فئستیوالین‌دان قاییتمیش ایستعدادلی شاعر-ترجومه چی، ده یرلی دوستوم سلیم بابوللااوغلو ایله گؤروشدوم. سفر تأثورات‌لارینی بؤلوشن سلیم ایستانبولدا اصلن گونئی آذربایجان‌ دان اولان شاعیر، اوسته‌لیک اورخان ولی ‌نین فارسجایا ترجومه چی‌سی شهرام شئیدایی ایله تانیش اولدوغونو سؤیله‌دی (بون‌دان بیر قدر اؤنجه سلیم ده اورخان ولی‌نین “بوتون شعیرلری”نی آذربایجان دیلینه ترجومه و چاپ ائتدیرمیشدی). سونرا اونون فارسجا ایکی شعیر و بیر نثر کیتابینی منه وئردی. قرارا گلدیک کی، من شهرامین بیر نئچه شعیرینی سئچیب ترجومه ائدیم و ترجومه‌لر سلیم ین باش رئداکتورلوغو ایله چیخان “دونیا ادبیاتی” درگی‌سینده چاپ اولونسون. اما درگی‌نین نشرینده یارانان فاصیله اوجباتین ‌دان شهرام شئیدایینی ساغ ایکن قوزئی آذربایجان اوخوجوسونا تانیتماق ایستییمیز باش توتمادی. بو تیپ ‌لی دیگر پلان‌لاریمیز کیمی...

هر حالدا همین اوچ کیتاب سایه‌سینده من چوخ ایستعدادلی بیر سویداشیمیزین اؤزونه مخصوض پوئتیک دونیاسی ایله تماسدا اولماق ایمکانی قازاندیم و بونا گؤره سلیم بابوللااوغلونا میننتدارام. سونراکی آراشدیرما و موشاهیده‌لریم ‌دن شهرامین تکجه گونئی آذربایجان دئییل، بوتؤولوکده ایران ادبی موحیطینده کیفایت قدر تانینان و ساییلیب-سئچیلن بیر قلم صاحبی اولدوغو قناعتینه گلدیم...
شهرام شئیدایی ‌دن بیر ده اؤتن ایل – گونئی ‌لی یازار مظاهیر شهامت باکیدا اولارکن صوحبت دوشدو. شهرامی یاخین‌ دان تانییان مظاهیر اونون خرچنگ خسته‌ لیگینه توتولدوغونو و دورومونون آغیر اولدوغونو بیلدیردی. سونرا موختلیف سایت و بلوق‌لاردا واختاشیری شهرام شئیدایی‌نین خسته ‌لیگی‌نین گئدیشی ایله باغلی معلومات‌لارا، قلم دوست‌لاری‌نین تأثیرلی یازی‌لارینا راست گلدیم. او، بیر ایلدن آرتیق موددتده آمان‌سیز خسته‌لیکله (قیدا بوروسون ‌داکی خرچنگله) چارپیشدی، تئهران ‌داکی موعا‌لیجه‌دن بیر نتیجه حاصیل اولمادیغینی گؤروب آلمانیایا یوللاندی، اما اورا‌دان دا اومیدسیز قاییتدی. حکیم ‌لر اونا خالق طبابتین ‌دن فایدالانماغی توصیه ائتدی‌لر. بونون دا خئیری اولمادی...
شهرام شئیدایی‌نین ایلک شعیرلر تو‌پلوسو 1995- جی ایلده ایشیق اوزو گؤروب. 2000- جی ایلده داها بیر شعیر کیتابی و “قاچقین‌لاری قووورلار” آدلی حئکایه ‌لر توپلوسو چاپ اولونوب. بو آرادا ترجومه چی‌لیک فعالیتی ایله ده مشغول اولان شهرام گونئی ادبیاتی‌ نین اؤنملی نماینده‌لرین ‌دن بیری صالح عطایی ‌نین “بلکه داها دئینمدیم” آدلی شعیرلر توپلوسونو فارس دیلینه ترجومه ائتمیش و همین کیتاب اصلن اردبیل‌دن اولان اونلو ترجومه چی رضا سئیید حوسئینی‌نین موقددیمه ‌سی ایله تئهراندا نشر ائدیلمیش‌ دیر. 2004- جو ایلده شهرام شئیدایی‌نین اورخان ولی‌ دن ائتدیگی ترجومه‌ لر کیتاب حالیندا چاپ اولونموش، آردینجا او، باشقا بیر “غریبچی‌نین” – ملیح جؤودت آندای ین سئچیلمیش شعیرلرینی ده فارسجایا چئویرمیش‌ دیر. اونون ایشلری سیراسیندا مشهور پولشا شاعره ‌سی، نوبئل موکافاتچی ‌سی ویسلاوا شیمبورسکا ‌دان ائتدیگی ترجومه ‌لر ده قئید اولونما‌لی‌دیر...
شهرامین اون بئش ایل بوندان اول یازدیغی شعیرلردن بیری آشاغی ‌داکی میصراع ایله بیتیردی:

نه قدر گئج دئییل، اؤلمک گرک...

تله سدی شهرام. اؤزو دئمیش، کاش بئله تله سمه ییدی...

P.S. وئریلن معلومات‌لارا گؤره، شاعرین جنازه‌سی نویابرین 25-ده تئهران یاخینلیغین‌داکی کرج شهرینده تورپاغا تاپشیریلیب.



داوامی
بؤلمه:

شهرام شئیدایی. شعیرلر

فارسجا‌دان چئویرن: مسیح آقا محمدی

بو اوتاقدا

قورخورام، تورپاغین آلتیندا یازاجاغیم شعیرلری
اوخویا بیلمییم کیمه‌سه.
من تله سیرم
و غریبه ‌دیر کی، چوخ راحاتام.
قبریمین اوستونه گلیب
اؤلومومه اینانان کس
منی اؤزونده اؤلدوروب.

گله‌جک یوخولاریمی گؤرموشم،
سونراکی ایللریمی یاشامیشام
و بو آرتیق‌لیق منه اذیت وئریر.
کاش بئله تلسمه ییدیم،
اوندا ان آزی هامی کیمی
سیغاردیم زامانا
و بیرگه اولاردیم دوستلا، شهرله، تورپاقلا.
بو قدر قاپی دؤیمک عبث ‌دیر،
آچمیرلار قاپی‌لاری،
نه بیر کس گؤرور سنی
نه ده ائشی‌دیر سسینی.
تلسمیشم
و او قدر گئتمیشم کی، قاباغا
اینانمیرلار دیری اولدوغوما.
بو اوتاقدا، تورپاغین آلتیندایام
و یازیرام.
هئچ زامان قورخمورام اؤلوم ‌دن،
چونکی بیر اؤلو اولمایاجاغیما امینم.
نئجه اولا بیلر کی، دئسین‌لر، هر شئی بیتیب
و قاییدا بیلمزسن داها.
بو، منیم اوچون هامییا ال وئرن بیر زارافات کیمی‌دیر
و من اللریمی گیزلدیرم:
آداملا زارافات ائدن حقیقت
تام شوبهه‌لی بیر شئی.
من اؤلومو حیاتا گتیرمیشم
و اوندان چیخارمیشام.
و غریبه ‌دیر کی، هر گئجه باییرا چیخیب
قبیر داشیما تزه بیر شعیر یازیرام،
سونرا یئنی‌دن یاتیرام.
و گوندوزلر سیزین آرانیزدا:
ائوده آناملا،
ایشده همکارلاریملا
اولماغیما حیرت ائدیرم.

اوشاقلیغیمین قاپی ‌سی آچیق قالیب.
و زامان منی ایتیره بیلمدیگی اوچون
ایگیرمی یئددی یاش‌ لی گنجلیگیم ‌دن چیخیب.
اوشاقلیغیم ایگیرمی یئددی یاش‌ لی من له صؤحبت ائدیر:
- بو گون ایلک دفعه مکتبه گئتدیم.
ایگیرمی یئددی یاش ‌لی من اونون پاریلدایان گؤزلرین ‌دن اؤپور:
- پرستیش ائدیرم ائودن مکتبه گئدن یولا.
اوشاقلیغیم ایگیرمی یئددی یاشی ‌نین شکیل ‌لرینه باخیر
و بیلمیرم، نه آنلاییرسا،
بیر نئچه گئجه دالبادال
یوخودا قیشقیریب آغلاییر.
گرک اونو قویمایایدیم یازدیغیم اوزون حئکایه نی اوخوسون،
گرک اونو قویمایایدیم گله‌جک شکیل‌لرینه باخسین.
من تله سیرم،
ایستر کئچمیشده، ایستر گله‌جکده.

سینه داشیم تیتره ییر،
یقین
بیر شعیر یازمیشام یئنه.

1995- جی ایل


زینداندا محببت

آغاج‌لارین باشینا فیرلانیب قیشقیریرام:
منیم اوچون دعا ائدین،
منیم اوچون دعا ائدین
کی، بو درد دن... :
- هامینی سنین صورتینده گؤرورم
کوچه‌ ده،
یوخودا،
او آغ اؤرپک ده.

“لوطفاً، آیاغا دورون!”
آنلاییرام کی، محکمه ‌ده ‌یم.
“هاوایا!”
آنلاییرام کی، زینداندایام
.
کامئرا یولداشیم ‌دان تقصیرینی سوروشورام،
عصبی حالدا دئییر:
“آزادلیغی پیس تلففوظ ائتمیشم،
پیس!”
دیوارلار چیغیریر،
دمیر میل‌ لر باغیریر:
“سیز هامینیز
آزادلیغی
پیس تلففوظ ائتمیسینیز،
پیس
...
- دوز دئییرلر -

یالنیز حیط ‌ده کی آغاج‌لارا اینانیرام،
هاوا اودماغا چیخاندا
قاچیب اونلاری قوجاقلاییرام،
آغلایا-آغلایا:
- منیم اوچون دعا ائدین،
منیم اوچون دعا ائدین.
...

عزیزیم!
زین‌داندا محببت
مشققت ‌دیر.

1994- جو ایل

♦♦♦

اؤزون ده بیلمه ‌دن دانیشمیسان،
اؤزون ده بیلمه ‌دن یاشامیسان،
اؤزون ده بیلمه‌ دن اؤلموسن.

ساعتی سوروش، کؤمک ائدر بو سنه،
هاوا‌دان دانیش، کؤمک ائدر بو سنه،
آنانین آدینی یادینا سال،
کیمینسه شکلینی و قیافه‌سینی.

تئز اول! خیردا بیر شئی ‌دن باشلا،
مثلن، رنگ‌ لر، مثلن، ساری رنگ،
یاشیل، بیر نئچه آغاجین آدی،
اولمایان بئینینی ایشه سال،
فصیل ‌لری، مثلن، قار.
تئز اول، تئز،
وارلیغین اوچون بیر شئی تاپ، گؤز گزدیر اطرافا،
بلکه قالان شئی‌لر یادینا دوشه.
تئز اول! یوخسا
دوغرودان
اؤلومونه
اؤیره شرسن.

1997- جی ایل




داوامی
بؤلمه:

مسيح آقا محمدي. رضا براهنی ایله ایلک گؤروش

رضا براهنی! بو آد یالنیز سون بیر آیدا آذربایجان (بورادا و سونرا، طبیعی کی، قوزئی آذربایجان نظرده توتولور – م.م.) مطبوعاتی و ادبی ایجتیماعییتی‌نین گوندمینه گلیب. همین واختا قدر ایسه بو بؤیوک یازیچی-موتفککیری آزسای‌لی ایرانشوناس‌لاریمیز، تک-توک ادبیاتچی‌لاریمیز، بیر ده آذربایجان دیاسپورونون موعیین قیسمی تانیییب. ماراق‌لی‌دیر کی، باکییا سفری زامانی ر.براهنی، دئمک اولار، بوتون معلومات‌لاردا “دونیا شؤهرت‌لی یازیچی” کیمی تقدیم ائدیلیردی، اما ندنسه بو شؤهرت ایندیدک دونیانین (و ایکی یه بؤلونموش وطنی‌نین) بیر پارچاسی اولان آذربایجانی احاطه ائتمه‌ییب. حتی معلوم اولدو کی، اؤزونو آرازین او تایین‌داکی ادبیاتین بیلیجی‌سی سایان شاعر و ناشیریمیز بو واختا قدر ر.براهنی‌نین هئچ آدینی دا ائشیتمییبمیش. باخمایا‌راق کی، هله بئش ایل اول سلیم بابوللا اوغلونون باش یازاری اولدوغو “دونیا ادبیاتی” درگی‌سینده بو سطیرلرین مؤلفی‌نین ترجومه‌سینده ر.براهنی‌نین “طلا در مس” (“میسده قیزیل”) آدلی مشهور کیتابین‌دان بیر پارچا چاپ ائدیلیب، اوچ ایل اؤنجه ایسه بنده‌نیزین رئداکتورلوغو ایله چیخان “باکی-تبریز” ژورنالیندا ر.براهنی ایله گئنیش بیر موصاحیبه درج اولونوب...

هر حالدا، رضا براهنی داک همصدری، میللت وکی‌لی، خالق شاعری صابیر روستم خان‌لی‌نین دعوت‌لی‌سی اولا‌راق باکی یا گلدی، بیر چوخ گؤروش‌لر کئچیردی، بیر سیرا تدبیرلره قاتیلدی و کانادایا قاییتدی. من سفردن بیر ایز قالسین دئیه، ر.براهنی‌نین کیچیک ده اولسا، بیر کیتابینی نشر ائتمک تشببوثونو قالدیردیم. صابیر بی بو تشببوثو دستکله‌دی و اونون سعیی ایله یازیچی هله باکی دا ایکن منیم ترتیب ائتدیگیم “رضا براهنی: شئیرلر، موصاحیبه‌لر، آراشدیرما” آدلی کیتاب “قانون” نشریاتیندا ایشیق اوزو گؤردو.
ر.براهنی‌نین بیوقرافیاسی‌نین باش‌لیجا مقام‌لارینی عکس ائتدیرن قیسا تانیتما یازی‌سی ایله آچیلان کیتابا گؤرکم‌لی ادیبین 20-دن آرتیق شئیری، ایکی موصاحیبه‌سی و بیر آراشدیرماسی داخیل ائدیلمیش‌دیر. “شئیرلر” بؤلمه‌سینده دوکتور علی قره‌جه‌لونون فارسجا‌دان چئویردیگی “تبریز شئیرلری”، مشهور “کپنک‌لره خیتاب” کیتابین‌دان سلیم بابوللا اوغلونون (9 شئیر)، بئهروز صدیقین و لاله جاوانشیرین (هره‌یه 1 شئیر) ائتدیگی ترجومه‌لر یئر آلمیش‌دیر. موساهیبه‌لر و آراشدیرما ایسه منیم طرفیم‌دن ترجومه اولونا‌راق، چاپا حاضیرلانمیش‌دیر.
البته، رضا براهنی یارادیجی‌لیغی‌نین میقیاسینی گؤز اؤنونه گتیردیکده (او، 60-دان چوخ کیتابین مؤللیفی‌دیر)، بو کیتاب، نئجه دئیرلر، دریا‌دان بیر داملا‌دیر، اما ایجتیماعییتیمیزی اونون شخصییتی، ادبی-تنقیدی و میللی-ایجتیماعی دوشونجه‌لری ایله تانیش ائتمک باخیمین‌دان گرک‌لی بیر ایشدیر. هم ده بو، ر.براهنی‌نین آذربایجان اوخوجوسو ایله ایلک گؤروشودور. سونراکی، داها احاطه‌لی گؤروش‌لرین باش توتماسی ایسه ترجومه چی و ناشیرلریمیزدن آسی‌لی‌دیر...


داوامی
بؤلمه:

مسيح آقا محمدي. ادبيات تاريخيميزين اوخونماميش صحيفه لري

آذربايجان ادبياتي تاريخي نين علمي شکيلده اؤيره نيلمه سي نين فيرودين بي کؤچرليدن اوزو بري زنگين بير عنعنه سي فورمالاشميشدير. همين عنعنه ايستر آراشديرمالارين تمل داشيني تشکيل ائدن متن شوناسليق چاليشمالاريني، ايسترسه ده نظري و تيپولوژي تدقيقاتلاري احتيوا ائدير. بونونلا بئله اورتا عصرلر ادبياتيميزين تاريخينده «آغ لکه»لر، قارانليق صحيفه لر ده آز دئييل. خوصوصن آناديللي شعريميزين نسيمي، فوضولي، واقيف کيمي ذيروه لري طبيعي اولاراق اساس ديققتي اؤزونه جلب ائتديگيندن، اونلارين «اطرافيندا» يازيب-ياراتميش و عصرلر کئچديکجه اونودولاراق اثرلري دونيانين موختليف کيتابخانالاري و اليازما ساخلانجلارينا سه په لنميش شاعيرلرين بديعي ايرثي اکثر حاللاردا تدقيقاتچي ماراغيندان کناردا قالميشدير. هرچند اؤزلوگونده آيديندير کي، بو «ذيروه»لره گئدن يول محض اونودولموش «وادي»لردن کئچير و «ذيروه»لرين آرخاسيندا هئچ ده «اوچوروم»لار دايانمير، باشقا سؤزله، يالنيز همين بديعي ايرثي اؤيرنمکله، اورتا عصرلر آناديللي پوئزيياميزين گليشمه سيني بير پروسئس کيمي قاوراماق و تصوور ائتمک مومکوندور. نه ياخشي کي، بو حقيقتي آنلايان و سؤزو گئدن بوشلوقلاري آرادان قالديرماق ساحه سينده آغير زحمته قاتلاشان تدقيقاتچيلار وار. بونلاردان بيري ده آلمانييادا ياشايان جنوبلو سويداشيميز محمد علي حوسئيني دير. اونون «ادبيات تاريخيميزدن صحيفه لر» آدلي کيتابي کلاسسيک آناديللي شعريميزين تاريخينده کي اوخونماميش صحيفه لره نظر سالماق ايستيقامتينده آتيلميش اوغورلو بير آدديم کيمي ده يرلنديريله بيلر.

کيتابا اون اوچونجو يوزيلليکده ياشاييب-يارادان حسنوغلودان توتموش اون دوققوزونجو عصر مؤليفي ذيکري اردبيلييه قدر اون ايکي شاعير (سولطان احمد جلايري، خاجه عبدولقادير ماراغايي، خليلي، شاهي، يوسيف بي اوستاجلو، ميرزه صالئح تبريزي، مليک بي اووجي، وحيد قزويني، تاثير تبريزي، نشئه تبريزي) حاقيندا معلومات و اثرلريندن نومونه لر داخيل ائديلميشدير. بو مؤليفلرين بير قيسمي ايلک دفعه اولاراق محض م. حوسئيني طرفيندن اؤيره نيله رک علمي-ادبي ايجتيماعيته تقديم اولونموشدور. اوللر موختليف مجموعه و درگيلرده نشر اولونموش بو آراشديرمالاري بير يئره توپلاماقلا، محمد علي بي اصلينده آناديللي شعريميزين يئددي عصرليک اينکيشاف تاريخي باره ده تصوورلريميزي خئيلي درجه ده دولغونلاشديرميشدير.
آراشديرمالاردا ديقتي چکن باشليجا مقام اونلارين زنگين منبع شوناسليق بازاسيدير. بو جهتي کيتابا اؤن سؤز يازميش پاشا کريموو دا وورغولاميشدير: «محمد علي بیي بير تدقيقاتچي کيمي سجيييلنديرن اساس جهت اونون هر بير فاکتي ثوبوت ائتمک اوچون مومکون قدر داها چوخ، داها زنگين منبع لره موراجيعت ائتمه سي، فاکتلارا چوخ جيدي موناسيبت بسله مسيدير». محض بو کئيفيت ده کيتابين اوغورونو تأ مين ائتميشدير. م. حوسئيني حاقيندا دانيشديغي مؤليفلر و اونلارين ادبي ايرثي باره ده هرطرفلي تصوور ياراتماق اوچون چئشيدلي مأخذلرده کي معلوماتلاري ذره-ذره توپلاميش، آذربايجان، ايران، تورکيه و آوروپا کيتابخانالاريندا ساخلانان اليازما نوسخه لريني موقاييسه لي صورتده آراشديرمايا جلب ائتميش، اؤزونون قئيد ائتديگي کيمي، تاپينتيلاري و قناعتلري باره ده سريشته لي موتخصيصلر، او جومله دن، اينگيلتره ده ياشايان ديگر سويداشيميز، اورتا عصرلر آناديللي شعريميزين اونلو تدقيقاتچيسي پروفئسسور تورخان گنجه یي ايله مصلحتلشميش (يئري گلميشکن، او، کيتابيني دا بؤيوک قدردانليقلا تورخان به يه ايتحاف ائتميشدير)، سون نتيجه ده علمده مؤوجود اولان بير سيرا فيکيرلره دوزه ليشلر ائتمه يه ده نايل اولموشدور. ديقته لاييق جهتلردن بيري ده اودور کي، مؤليف نادير اليازمالاردان توپلاديغي ادبي نومونه لرين فوتوصورتلريني ده کيتابا داخيل ائتميشدير، بو ايسه موتخصيصلر اوچون چوخ اهميتليدير.
م. حوسئيني ادبيات و ديل تاريخيميزين فاکتي کيمي کيتابا داخيل ائتديگي نومونه لرين بديعي کئيفيتلريندن بحث ائتمير. بو دا طبيعيدير، چونکي فارسديللي شعرين حاکيم مؤوقئعده اولدوغو دؤورلرده ميللي ادبيات و ديل فاکتي اولماغين اؤزو اونلارين علمي و ادبي اهميتيني شرطلنديرير. لاکين بديعي-ائستئتيک باخيمدان دا وئريلن نومونه لرين بير چوخو خوصوصي ديقته لاييقدير. ميثال اوچون، ميرزه صالئح تبريزي نين آشاغيداکي ميصراعلارينا نظر سالاق:

مئهرو وفا سؤزونو هئچ کيمسه دن اينانماز،
يغمادان ال گؤتورمز، بيداددان اوسانماز.
جان وئرميشم يولوندا يوز مين خجالت ايله،
بيلمن نئچون دئميشلر وارين وئرن اوتانماز…
من چرخه آتميشام داش، من عشقي ائتميشم فاش،
مرد ائتديگيني سؤيلر، ار دئديگيني دانماز.
تؤهمت ائيلر اؤزونه، نه سؤيلر اؤزگه سيچون،
اوتانمايان اؤزوندن هئچ کيمسه دن اوتانماز.
گؤز حاق يولوندان اؤرتن تنبيهي حاققا لازيم،
آغير اولان يوخوسو اوياتماسان، اويانماز.
صالئح، نه کيبرييادير اول نازلي ديلروبادا،
هئچ خسته سيني سورماز، هئچ عاشيقيني آنماز.

بو تيپلي نومونه لر، هئچ شوبهه سيز، گله جکده هم ادبياتشوناسلار، هم ده ديلچيلر اوچون ماراقلي تدقيقات اوبيئکتي اولاجاقدير. سوندا اونو دا قئيد ائتمک يئرينه دوشر کي، محمد علي بي ادبيات تاريخيميزين نامعلوم صحيفه لريني آراشديرماق ساحه سينده گرکلي فعاليتيني داوام ائتديرير. بو ياخينلاردا او، لئيدئنده (هوللاندييا) اون یددینجی عصرين گؤرکملي شاعيرلريندن بيري، صايب تبريزي نين موعاصيري مجذوب تبريزي نين آذربايجان ديلينده موکممل ديوانيني آشکار ائتميشدير و حاضيردا بو ديوان چاپا حاضيرلانير. بيزه ايسه جيدي تدقيقاتچي و سون درجه تواضعکار اينسان اولان محمد علي حوسئينييه چتين و شرفلي ايشينده اوغورلار آرزولاماق قالير.


داوامی
بؤلمه:

ابولحسن ریاضی. کامو و اينسانين قييامي

چئوير ن: مسيح آقا محمدي

كؤچورن : همت شهبازي

آلبر کامو (1913-1960) «طاعون»، «يابانچي»، «سقوط»، «کاليقولا»، «سيزيف حاققيندا ميف» کيمي اثرلرينده موعاصير اينسانين وضعيتيندن، اونون چکديگي عذاب و ايضطيرابلاردان گئنيش صؤحبت آچميشدير. «طاعون»دا دسته-دسته محوه سوروکله نن اينسانلار، اؤلوم قورخوسو و حيات عشقي ايله يوغرولموش موناسيبت لر تصوير ائديلير. «يابانچي»دا قهرمان اويون قايدالارينا اويغون شکيلده داورانا بيلمه ديگي اوچون محوه محکومدور. او، ياشاديغي جمعيته ياددير. همين جمعيتده شخصيتين حرکت وئريجي قووه سي نئگاتيو بير حقيقتدير کي، اونسوز اينسانين اؤزو و دونيا اوزرينده غلبه چالماسي باش توتان ايش دئييل. بونا گؤره ده اثرين قهرماني راحاتليق نامينه سسسيز-سميرسيز اؤلومو سئچمه لي اولور. او، نه سوسيال عدالت سيزلييي پيسله يير، نه ده اونونلا مباريزه آپارير؛ او يالنيز تنهاليغي اؤز وضعيتينه اويغون بيلير.
سيزيف هم داخيلينده کي ائحتيراس، هم ده چکديگي عذاب باخيميندان آبسورد (پوچ گرا) قهرمانيدير. او، دايم بير داشي داغين زيروه سينه قالديرير، زيروه يه چاتديقدا ايسه داش يئني دن آشاغي ديغيرلانير. بو، هميشه عبث، بيهوده و اوميدسيز بير ايشي تکرار ائتمه يين لابودلويونو آنلاماقدان دوغان دهشتلي بير جزادير. «سيزيف حاققيندا ميف» اينتيحار باره ده صؤحبتله باشلايير، قييام مؤضوعسو اطرافيندا بحث له قورتارير.

کامو امين دير کي، فيلوسوف اولماق اوچون موطلق يازيچي اولماق لازيمدير. يئني وارليغين معناسيني آختاران اينسان عمللي-باشلي موعاصير حياتين ايچيندن کئچمه ليدير. کامونون فيکرينجه، همين مسئله نين قويولوشو اوچون زامان و مکان چرچيوه سينده اولان ايدراک ضروريدير. اونا گؤره ده فلسفه يازيچيليغا مؤحتاجدير. کامونون موعاصيري اولان اينسان هر شئيي قيريب-سينديرميش، قورتولموش و قييام ائتميش بير اينساندير. دئمه لي، بئله بير اينسانلا ياشاماق و صيرف داخيلي سوبيئکتيولييه دئييل، ظاهيري اوبيئکتيولييه ماليک بير رئالليغي آراشديرماق لازيمدير.
کامو «قييامچي اينسان»دا آزادليق و عدالت نامينه تؤره ديلن بوتون بو قيرغينلارين و يئني دؤور آدامي نين کوتله وي اينتيحاردان آلديغي خسته جه سينه حظظين ايضاحيني آختارارکن، اولجه قييامين کؤکونده دايانان پروسئسه ديققت يئتيرير. بو پروسئس اينسان طرفيندن تانري نين قدرتي نين اينکاري ايله باشلايير، تانرييا برابر و سونرا ايسه اوندان اوستون اولماسي ايله داوام ائدير و تانري نين اؤزونون اينکاري ايله باشا چاتير. قول آغاسي نين يئريني توتوب آللاهليق ادعاسينا دوشور. حال بوکي او، بئله بير مقاما چاتاجاغيني نه گؤزله ييردي، نه ده اونا لاييق ايدي. دوننکي شوعارلار بو گون حياتا کئچمه ليدير، اينسان طرفيندن اينسان اوچون عدالت و آزادليق تأمين اولونماليدير. و بو قورخونج مسئوليت ضعيف لرين ايضطيراب، يورغونلوق و قيياميني دوغورور.
«مئتافيزيک قييام»دا اينسان اؤز وضعيتينه و بوتون وارليغا قارشي اعتيراض سسيني اوجالدير، اونون تانري مقامينا تهلوکه تؤره دن اؤلومون مؤوجودلوغونا اعتيراض ائدير. بونا گؤره يئني آغالار کؤهنه و يئني قوللاري اؤلدورمک ايختيياريني اله آلماقلا اؤزلريني ساکيت لشديريرلر. جينايت يئني ليباسا بورونور (چونکي آرتيق کيمينسه آغاسي اولماق اونون جانيني آلماق ايمکاني دئمکدير) – جينايت لر داها غضبدن تؤره مير، حظظ آلماق اوچون باش وئرير… مئتافيزيک قييام ان پيس شئيلري گؤزله مک يولونو سئچير و بو سئچيم «لعنت ادبياتي»نين مضمونون تشکيل ائدير کي، بيز هله ده اوندان خيلاص اولا بيلميريک. او، دونيادا درد و عذابين مؤوجودلوغو باره ده سوالين جاوابيندا بير غضب اوزرينده ايصرار ائدير و بو غضبده حاقلي اولماسا دا، يئنه اوندا ايصرار ائتمه ليدير. بئله ليکله، قييامچي اينسانين طلبي «يا هر شئي، يا دا هئچ نه»دير.
اينسان تانريني اخلاقي محاکمه اوبيئکتينه چئويرنده، اونو اؤز قلبينده اؤلدورموش اولور. بونا گؤره ده کامو سوروشور: مگر تانري ايدئياسي اولمادان عدالت ايدئياسي آنلاشيلا بيلرمي؟ بئله اولان حالدا اخلاقين بونؤوره سيني نه تشکيل ائده جک؟ محض تانري نين اينکاري و اخلاقين بونؤوره سي نين داغيلماسي نتيجه سينده اينسان چيخيلماز دايره يه دوشور و نيهيليزمه يووارلانير. کامو بؤيوک بير فصيلده نيهيليزمين بانيسي اولان نيچه نين باخيشلاريني شرح ائدير…
کامونون شرحينده نيچه نين فلسفه سي قيياما اساسلانان بير فلسفه دير. نيچه نين تانريني اينکار ائتمک مقصدي يوخدور، آمما او، موعاصيرلري نين روحوندا تانري نين اولماديغيني گؤرموش و ايلک دفعه بو فاکتين جيدي اهميتيني آنلاميش، اونا نظارت ائديب استقامت لنديرمک فيکرينه دوشموشدو. او، بيليردي کي، ذهني آزادليق - راحاتليق دئييل، عکسينه، اينسانين جان آتديغي و اوزوجو مباريزه لردن سونرا الده ائتدييي بير نايليتدير و بو يوللا اينسان قانونون فؤوقونه قالخير، چونکي هئچ نه حقيقي دئييلسه، هئچ نه قاداغان دا دئييل. آمما همين يولدا اينسانين قارشيلاشديغي ضيديت بوندان عيبارتدير کي، او، موطلق آزادليغا يئتيشمير، عکسينه، دييشيک ليک و دييشکن ليک اسارتينه دوچار اولور. بئله کي، يوکسک دَيرلرين اولماديغي، تصادوفون و قانونسوزلوغون حؤکم سوردويو بير شرايطده اينسانا ظولمتده آدديملاماقدان و بونؤوره سيز، قورخولو آزادليقدان باشقا بير شئي نصيب اولا بيلمز. اونا گؤره ان کاميل آزادليغين سونوندا اينساني ان کاميل آسيلي ليق گؤزله يير. او، سکسکه لي بير سئوينجله دالانا دوغرو گئدير، سوکان ايسه نيهيليزمين الينده دير. اونون مقصدي تضاددين سون نؤقته سينه چاتماقدير.
نيچه نين وارليغا قارشي قييامي شرعین تعريفي ايله بيتير، ائله بير شرعین کي، او، آرتيق کين-کدورت دئييل، عکسينه، خئيرين تظاهورلريندن بيري و طالعيين بير پارچاسيدير. بو فيکيرلرين ايشيغيندا او، هم ده صنعتکار اولان دئسپوتلاري (حاكم مطلق، مستبد) خاطيرلاييردي. او دئسپوتلاري کي، عاغلين گوجو سايه سينده بوت لره پرستيشدن چکينه رک، هر شئيه «هه» دئديکلري زامان، اينسان قتلينه ده «هه» دئييرلر.
فلسفه و فيلوسوفلار ايدئاللاري يئرله-يئکسان ائديرلر، آما ائله دئسپوتلار مئيدانا چيخير کي، تئزليکله هم ايختييارلاريندا اولان فلسفه لري دارماداغين ائدير، هم ده بو اساسدا دؤولت لر قورورلار. هئگئل دن سونراکي دؤولت لر طبيعتي رام ائتمکله، تاريخه قارشي دورماقلا خريستيانليغي يئرله-يئکسان ائتمه يه باشلايير و بوتون اينسانلاري آلته چئويريرلر. و بيز ماددي ريفاه آرزولاديغيميز اوچون سون نتيجه ده ايندييه دک ميثلي گؤرونمه ميش بير معنوي کؤله ليگه دوغرو گئديريک. بئله ليکله، بؤيوک قييامچي نيچه اؤز الي ايله ضرورتين آمانسيز حاکيميتيني ياراتدي و تانرييا باغلي ليقدان خيلاص اولان کيمي تاريخ و عاغلين زينداني نين تيکيلدييني گؤردو.
کامونون فيکرينجه، بو گون دونياني بوروين حقيقي قييام يوخ، نيهيليزمدير و اخلاقي نيهيليزم دونيايا ياييلديقجا، قييام اؤزونون بوتون نايليت لريندن يالنيز حاکميت ايراده سيني قورويوب ساخلايا بيله جکدير. اينسان اؤز باشلانغيجيني اونودوب سونو باره ده دوشونور و دويماق بيلمه ين روحونون کؤمه يي ايله اوزون و داواملي قيرغين لاردان کئچيب «دونياني فتح ائتمک» اوچون عاغلي اؤزونون يئگانه آلتينه چئويرير. اينسانين اينسانا اوستون گلمه سينه يؤنلميش «عاغيللي جينايت لر» باش آليب گئدير و بئله جه اينسان تکله نير…
کامو «قييامچي اينسان»دا غرب آدامي نين ال به ياخا اولدوغو فلاکتلي گئرچک ليگين کؤک لريني آراماغا جهد ائتميشدير. او، بو کيتابيندا نه اينسانين علوي آرزولاري نين رئاللاشماسي اوچون قطعي بير حل يولو تکليف ائتميش، نه ده اونون صيرف اينساني پروبلئمزلري نين ساده ليينه داير نيکبين ليک آشيلاميشدير. آمما هر حالدا، کيتاب کامونون بئله بر باخيشيني عکس ائتديرير کي، او، «اينسانين طالعيي باره ده پئسسيميست (بدبين)، اينسانين اؤزونه موناسيبتده ايسه اوپتيميست دير (خوش بين)».




داوامی
بؤلمه:
Copyright © 2009 ۞ جاهان ۞.
Designed by Theme Junkie. Converted by Wordpress To Blogger for WP Blogger Themes. Sponsored by iBlogtoBlog.